امن اول الرجّال لامن اجاره = رجلٍ فلا احدٍ ياصله من معاديه
ولو هو على رقبته صمد في قراره= ما غيّر لرايه ولاهاب شانيه
لو هو عطي وزنه ذهب في صراره= ما اغراه من يبغاه يترك مباديه
ومن اولٍ الرجل يرعى لجاره = ويغض طرفه لا لقى ما يعنّيه
ومن اولٍ الرجل يحمي ذماره = يحفظ لعرضه صامداتٍ مبانيه
يرعى المحارم دامهم كالحباره = يطمع بها اللي تايهٍ في مفاليه
واليوم صرنا في زمان التجاره = صرنا عبيد الفلس والكل غاويه
يبيعك اللي منحدر في القذاره= من شان يقبض طفسةٍ ما تعشيه
حتى ولو يكذب بظنّه شطاره = لا دين لا خلق ولا عقل يثنيه
وصرنا نشوف اللي وصل لانحداره= بالعرض يتساهل ولاهوب يعنيه
وانفلّت السبحه فكل بمساره= والبيت ضايع مالقى من يراعيه
والكل حر ولو خطى باختياره = حتى ولو قاصر تخدعه هقاويه
والكارثه فوق الحموله شراره = ومن بعد ماهي فوق تدفع مآسيه
فالفرد ماهو عندنا كالحجاره = لو طاح وحده ما درى عنه باقيه
الفرد عضو اسره تأثر بناره = وتدفع ثمن غلطته واللي يسويه
تنهار باسبابه وياللخساره = كم ضاع من اسره سبايب بلاويه
ايّة حضاره مدعين الحضاره = وايّة اصاله والعرب في تدنيه
خذوا قشور الغرب في كل غاره= وصاروا غرابٍ تايهٍ في مماشيه