[الطائر المهاجر]

يقولون لي وين شعر الغزل يافلان= واقول الغزل ما حتاج شعري لتسويقه
انا الشاعر اللي ضاع عمره مع القيفان= وزمان الغزل والحب ولّت طواريقه
فهذا زمان الفكر والنصح للعربان = فلاني بشعري من يغرر مخاليقه
اقدّم نصيحة من حياتي بلا أثمان= بدينٍ وعلمٍٍٍ صادقٍ من مواثيقه
اعالج مشاكل ظاهره في زمن خربان= ووجّه صغير السن والنايم افيقه
وقصيد المحبة يكتبه واحدٍ هيمان= ونا ثابتٍ لو انطلق مع مطاليقه
ويقولون مثّل بالهوى واكتب الا لحان= ونا مااعرف التمثل ولا لي بتلفيقه
ترى الناس ملت من "أحبك" ونا ولهان= تبي اللي يطلّع همها من صناديقه
تبي من يعبّر عن مشاعر وعن أحزان= وعن حال تجلب للملا الهم والضيقه
تبي حر ما يخشى سوى الواحد الديّان= يقول الصراحه ويرجي الله توفيقه
وهذا طريقي ما أبي شكر أو عرفان= ومن قال ما يصلح فلا احتاج تصديقه