[الطائر المهاجر]

دخلت "النت" مادري ويش الاقي = اعد خطاي لو كانت قليله
مثل اعمى يخاف الإنزلاقي= بدربٍ ماوضح عدله وميله
يقدّم كل خطوه في رفاقي = وينصت للزحام ولا يجي له
تعلم في طريقه درس.. باقي= بأنّه مثل من يمشي بليله
مواقع كلها ركض وسباقي= تبي الشهره ولاعنها بديله
خيولٍ جامحه فيها العتاقي = وفيها كل عرجا أو هزيله
وانا حرٍّ يدوّر باشتياقي = لمرباع الخيول اللي أصيله
وفرسانٍ تشدّد بالوثاقي= على سلم الرجوله والقبيله
تفيد وتستفيد بعقل راقي = وتترك من بدت منه الفشيله
فبعض الناس لو انه معاقي= يبي يسبق ولا جهز لخيله
تفتق ذهنه الخامل وفاقي= على خالف ترى تعرف وسيله
بدا بالركض في سوء الوفاقي= نوى يفرس ويجهل من قبيله
نفوس ضيّقه تهوى الخناقي = تعوّض نقصها وهي الذليله
ونا مالي بعير ولا نياقي= ولا فكّرت في مثله حصيله
اذا صادفت في دربٍ عواقي= تركته واثقٍ القى بديله
فبيت "النت" مفتوح الرواقي= وانا كالطير جنحانه تشيله
حرار الطير ربعي والرفاقي= الاقيهم على درب الفضيله