[الطائر المهاجر]

ما خبرت إنّي ضعيفٍ في حياتي = لين شفت الريم في نجد العذيه
في طريقي عابرٍ مالي وناتي= بعد ما حدّرت من راس الثنيّه
المها والريم ترتع في الفلاتي= والمرابع خضر بازهارٍ نديّه
قلت ابااريّح بعد طول العناتي = واتمشّى في الربيع ولا عليّه
الحظ الغزلان لو هن غافلاتي = ما درن عنّي ونا مالي ابغيّه
لين ما طاح النظر باجمل مهاتي= الحلا والملح سرّ الجاذبيّه
كامل الاوصاف لو لبس العباتي= ولو تستّر فالشمس ماهي غبيّه
قمت اقلب بالفكر ويش السواتي= كيف اباصل له وهو وسط البريّه
كودي اشبع ناظري قبل المماتي= ويمكن اسمع منه لو رد التحيّه
كلما قرّبت يركض للبناتي = ما درى إنّه مشعل بقلبي لضيّه
قلت ابخطم له وفادي في حياتي= لا ورد يروي صباح امن الركيّه
مع شروق الشمس من خلف الغضاتي= والدقيقه يوم ما اطولها عليّه
اقبلت والطرف في لحظه وفاتي= من عيون سهمها فيه المنيّه
الغنج والدل يمشي في ثباتي = والقمر والشمس في خدّه سويّه
قلت ابطلع له واخاف من الشماتي= قلت ابصبر لكن بقلبي شظيّه
غافلٍ والفكر سارح بالشتاتي = وقّفت تلتف في ذيك العبيّه
ثمّ قالت : ليش ترقب للبناتي= ما حسبت حساب لرجال الحميّه
ارحل بدربك قبل وقت الفواتي= لو دروا بك ذقت لاصناف الأذيّه
قلت: يالمجمول يا عذب الصفاتي= لاتخافي واحسني بالظن فيّه
من لحظتك صرت اسجم في صلاتي= عاشقٍ متعلّقٍ عن حسن نيّه
الشرف قصدي وحلمي يامناتي= يجمع الله بيننا قبل العشيّه
للبيوت ابواب ما عنّك غباتي = قالته في عقل ما حنّت عليّه
ثمٍ قفّت دون لينٍ بالقناتي = واخذه قلبي ولا ادري بالسويّه
يوم رحت اخطب بعد جهد وعناتي= واثرها انخطبت ونا بروحه وجيّه