قم يانديبي وصل الخط عالفور = سلمه بيد اللي عزيزٍ مقامه
وأشرح له اللي صار في عدة سطور=قله ترى قلبي تزايد هيامه
عايش على هالحال عامين وشهور = كله سبايب من سباني غرامه
ياما شكيت من علتي لكل دكتور= ودوايهم قالوا لي اعمل حجامه
مايدروا ان ادواي في يد مغرور = سلهم بعينه لي يريد انتقامه
الله كم لجله تحملت من جور= ليلي سهر يحرم عليه منامه
لاشفت زوله يصبح القلب مسرور=ولاغاب اشوف الكون زايد ظلامه
زوله يشابه زول زينٍ من الحور=صوب ضميري بنظرةٍ وأبتسامه
يابو يزيد العقل من الزين مسحور=رعبوب ساكن في ضواحي تهامه
لورحت للمغرب ولندن ولاهور=ورحت العراق وسوريا والمنامه
ماشفت من يشبه لبوجعد منثور=هذا دليل الوصف واكبر علامه
يالحرالأشقر ألك أنا أقول مشكور=وتحيتي لك قبل نعلن ختامه

أخوكم الدائم : أحمد الكثيري

ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ـــــــــــــــــــــ

ردي على الأسناد

يامرحبا وأعداد ماشعشع النور =باللي لفا خطه ويهدي سلامه
بأسم الكثيري فوق الأوراق منشور=وافي الخصايل وافي (ن) في كلامه
يشكي هوى خله بعد وصله الدور=ولايلحق العشاق مني ملامه
أسباب غرو ٍ بأسمه القلب محفور=ويجري مجاري الدم داخل عظامه
قبلك يموت معذب القلب مقهور=من وجنة المجمول لأرخى لثامه
وأنا غريقه فالمحيطات وبحور=مدري حلال الروح ولاّ حرامه
أهل الهوى حطو على قبورهم سور=كم من خليل ٍ مأهتنى في مرامه
اللي تظلل بالحشاء يبني قصور=مدري عمار الروح ولاهدامه
عمر الغلا ياناس له تسعة دهور =غرو ٍ على خده ذبحني وشامه
اللي سكن فالقلب ياناس مجبور=مثل الكثيري معلن ٍ به فطامه
الجاه قبل المال والروح مذخور =من رؤؤس قوم ٍ يحتمون الجهامه
قله نسوق الجاه في محكم الشور=ونقدرالعنوه بقدر أحترامه
إن كانها بالمال يطلب ومقدور=نسوق له منا يمين الشهامه
وأن كانها بالروح ماني بمعذور=روحي فدى من دون وجهي كرامه
أرواحنا لحياضها ورد وصدور=روح الشجاعه مالحقها ندامه
لنالروابح مانعود على السور=والعود بيّن من ليانه صرامه

أخوكم الدائم :

(الحرالأشقر)