[الطائر المهاجر]

ريمٍ جفولٍ رمى روحي بسهم الرموش = لا هوب اجهز عليها ولا تركني اعيش
نظره وحيده وانا بالدرب تقل مخروش= لاني بدرب الحجاز ولا طريقي لبيش
واصحى على همس ناعم فيه لومٍ وهوش = تعتب عليّه اتابع خطوة الريم.. ليش
قلت العفو ذا طريقي .. من لدربك يغوش = لكن وش اللي اتى بك يا ظبيّ العريش
قالت ادوّر وظيفه مثل بعض الحبوش = واللي غزونا وفودٍ من جميع الكديش
قلت الوظيفه قريبه يالغزال البشوش = مديرة اعمال قلبٍ من غرامك يجيش
قالت من انته وقلت الها عمامي القروش = امّا خوالي عقاراتٍ ونخلٍ وحيش
وأنا الأصيل المؤصل دون عرق مغشوش = شيخٍ ولد شيخ ماني وافدٍ أو هتيش
قالت وش اصلك وفصلك دون زايد رتوش= مالي بوضعك وجاهك خلها والقحيش
قلت الأصل يالحبيبة يدك واللي تحوش = مافادك اصلك تلاقي شغل فيه المعيش
حنّا بوقتٍ خسيسٍ من ترهى يدوش = من دون قرشك ترى كالطير من دون ريش
وقت تغيّر غدينا فيه طعم الجحوش = من كل وافد نهبنا من ضميرٍ غشيش
ولا حدٍ حمانا وفكّر بالظلام الغبوش = اللي يلف الجواعاء ساكنين العشيش
قالت غريبه يفكّر واحد من الكروش= في حال منهم بحالٍ يعلم الله وحيش
قلت الفقر كان عمي ظالمٍ بي بطوش = حتى عرفت التعامل معه مهما يطيش
فالفقر ماهوب عيب لو تحسّه رهوش= الفقر ما عاب خير الناس سيّد قريش
يدفعك تبني طموحك ما رسمته تنوش= بالصبر والجد تاصل لو ملابسك خيش
قرشٍ على قرش ينتج ما خفى من قروش= درب التجارة طريقك لوتشوفه غبيش
قالت كلامك صراحه باكتبه بالنقوش= لو كل عاطل فهم له كان يقدر يعيش