[الطائر المهاجر]

يستاسع الصدر لاشفت الظلام يزول=ولا شفت طاغي يطيح بشر اعماله
ويضيق صدري اذا شفت الغبار يحول= ولا دْري وش اللي وراه ويحجب ظلاله
في وقت شفت العجايب عرضها والطول = وكلٍ بليله على ليلاه موّاله
احد ينافق بمدحه لو يدق طبول= بايع ضميره وهمّه جمع بامواله
واحدٍ يبي المدح في ظنه جزيل فعول= مما تقول البطانه تخفي اهماله
ولا ثار شعبه يطالب قيل جمع خبول= وراهم اللي وراهم حقق اقواله
ان كان عاقل تنحّى لو رحل بذهول = وان كان جاهل بدا تجهيز افياله
يقتل بشعب عزل ماثمّن المجهول= حتى يجيه البلى من غير يحرى له
قوة تحالف تهز الأرض دون خيول = قنابل مدمره ما ترحم احواله
ومن عقب ماهو زعيم وهيبته بقبول= يصبح مطارد ومجرم محد يرثى له
يجمّد رصيده ويصبح كنه المشلول = ويمكن يحاكم ويعدم مثل امثاله
هي البطانه حكومة ظل فيها ختول= وفيها اناني يدور سرق لعياله
وفيها حقيرٍ خسيسٍ غايته لوصول= يتحمل الذل مهما كان اذلاله
فمن لا انتقى له رجالٍ فاضلين عدول= الصدق منهاجهم ماخافوا ازعاله
كلٍ نظيفٍ عفيف بفعلته والقول = ضمير حيٍ ويخشى يوم ترحاله
عينٍ على الشعب ماعنده اسد ووعول= الكل واحد ويعطي كلٍ إجلاله
لاظلم .. لافقر .. لاجوع بجبل وسهول= وثروة بلدهم تقسم مابها اشكاله
الكل ياخذ نصيبه دون ادنى غلول = والكل يحرص على الطيّب من خصاله
ومنهو تبيّن عميلٍ للعدا مرسول = يجتث عرقه ويجزى سيئ افعاله
منهاج رب الخلايق ما عرف لمْيول= ومن شذ عنّه يلاقي شر اعماله