[الطائر المهاجر]

قـولوا لمن غـرّه زمانه وصافاه = لا تامنه طبـع الغـدر ما يخـلّيه
وقـولوا لمن عاش الألم والمعاناه = لا بـدّ تفـرج لايبين الخـلل فيه
الــوقت دوّارٍ علـى من تناساه = والصبر شيمة من تدوسه مواطيه
وقـولوا لصـدامٍ حصـادك وتذراه = من يزرع الاوهـام لابـدّ تعميه
اهـواه من لا ارقـاه واقفى وخـلاه = في وسط حفره مالقى من يحاكيه
حتى مسكوه اللي لهم ثار يقفاه = اذناب فارس من حرقهم بماضيه
ولا من تسـاوى كـل شئ بدنيــاه = مـوت الفتي ارحم ولا ذلّ عاديه
لا انت الذي هاجمت والخصم بحكاه = ولا انت الذي سايست سيفٍ تعاديه
سـلّم على راسٍ تبي قطـع يمنـاه = واضحك بوجهه لين تضرب علابيه
من لا عرف للغوص من قبـل يبداه = ما يسمعك عند الغرق لو تناديه
ومن لاعرف ضعفه ولا قـوّة عـداه = مثل النعـام يدس راسه ويخفيه
ومن هيّـج الثـور الحمر لـو توطّاه = فهو السبب في اللي لقى من تعديه
ومن لا فتهـم للـوقت لابـدّ يقـراه = فاللي حصـل درسٍ لعـلّه يصحّيه
فمن لا كسب ربعـه بحلمه وتقـواه = يا سرع ما تبـدى عداوة محبيه
ومن ضحْك له من شان ياصل إلى الجاه= أوّل نكـورٍ يوم ياقـع ويشنيه
وقـولوا لبـوش عـارفينٍ نـواياه = ضربٍ براس الحيّ يوجع مواطيه
طـاح القنـاع وبـان غـدرٍ تبنّاه = وزيف الحضارة انكشف لا تغطّيه
ما دامنا في ضعف يمشي على اهواه = يفعـل على كيفه وشارون ينخيه
حنّا غدينـا غـراب ضيّع لممشاه = لاعلم خـذنا لا.. ولا الدين نشريه
ما عـاد به إيمـان عن قلب ننصاه = كله مظـاهر او ستـارٍ لـراعيه
وكلٍ يغنّـي دالـه بعشق ليــلاه = ولا يـوم فكّـرنا بذيـخٍ نـداريه
والنـاس تاهت كل واحـد تغشّـاه = سمّ الحضاره ما لقى من يداويه
من دون دينٍ صـادقٍ فاشـل دواه = ومن غير رب البيت يقدر يشافيه
يـالله يا للي تعـلم السرّ واخفـاه = تمحى عـدو الله تبطل مساعيه
وتبهج قلـوبٍ قهرها وصل لاقصاه = من غيرك اللي نلتجي له ونرجيه