ترى الزوجات فيهن العجابا = فتأمل يافتى تلقى الجوابا
من الخبرات تلقى انواع شتى= ولاهو علم محصور بكتابا
ولا تعرف حديهن لين تنجب = وتشوف عيالها صاروا شبابا
فنوع لنفسها لو ام عشره= انانيه تبي منهم رتابا
ولو ترسل حديهم شان يسرق = ويعطيها ولو طاله عقابا
مثل هذي ترى يومٍ تخلّى = اذا من عجّزت والراس شابا
وحيده ما سأل عنها ولدها = وتصبح مطمع لذات النيابا
ونوع لزوجها لو كان عاطل = تبي تيسٍ وتصرف ما تهابا
تشرد ورعها ماهيب يمه = مع الخدام رعيه كالدوابا
مثل هذي فلا تجني حصيله= وتضرب كف في كفٍ خضابا
ونوعٍ مثل شمعه ف الليالي= على الورعان لو شافت عذابا
تراهم ملكها محدٍ يعاتب= ولا حتى ابوهم لو اصابا
ربوة حرمةٍ والكل ماشي= على منهاجها لو به عيابا
مثل هذي ترى في يوم تندم= فلا هي حاسبه يوم الخطابا
فلا زوج يبي ينظر اليها = ولا عيالٍ تربّوا للصعابا
مع الزوجات كلٍ في طريقه = وتنذف مثل نذفات الكلابا
ونوعٍ شجرة دوحه ظليله = لزوج وولد بحضور وغيابا
تقوم ببيتها لو كان تعمل = وتحشم زوجها هو والقرابا
تربي عيالها في طوع ابوهم=يلاقي فيهم البحر العبابا
اصيله حرةٍ ما قيل عنها = ذهب صافي ولا شابه ترابا
مثل هذي عليها الرجل يحرص= يعيش السعد ماشاف اكتئابا
ولكن كيف تعرف قبل تعرس= اذا ماانته بذيب من الذيابا
يبي لك ما تعجل في قرارك = وترقب بيت اهلها باحتسابا
تتبع امها وشلون تحيا = لتعرف نوعها دون اقترابا
وشف وشلون ابوها كيف عايش= وكيف اخوانها هم والصحابا
وكيف اخواتها كلٍ ببيته = قبل ما تشد في يوم الركابا
ترى فعل السبب للمرء واجب= ولا لك عن قضا ربك حجابا