[ابو أنس]

الى الإبن الفاضل.. رائد بن عبدالعزيز العنقري
وقد لمحت فيه علامات الرجوله ومقوماتها .وقد عركته الحياة فأظهرت منه أكثر وأكثر
والمأمول منه كذلك أكثر.
هي تعبير وتذكير وشعور ومشاعر دونتها كما هي في ذهني وان لم تتسلسل أفكارها
وله القبول او الرد.
ولكم المشاركة والتقويم

قم ياجمل واصمد ترا الحمل لو زاد=ما يرتكي للحمل غير الرواسي
وما احدن تعزوى وانتخى واندب وشاد=الا بقرم(ن)يعرف العلم قاسي
صلب(ن)على ميلات بقعا به عناد=ما ينثني وان طاح طاح متواسي
واعرف ترا الدنيا مدارس بلا استاد=من التجارب والعمل والمِراسي
وما مدح احد او قيل له قرم الاولاد=الا الصميدع من عنا الوقت عاسي
وش عاد لوكانت حياتك بها جهاد=كل الحياة اقبالة(ن)وانتكاسي
والقصر لامنه تأسس على عماد=يصبر على مر الزمن والمآسي
وانت الحفيد ولك فخر بين الاحفاد=مادمت وافي بالعهد منت ناسي
اصبر على ميلات الاريا ولو كاد=واستصعب الموقف وشفته عفاسي
وبالك تعادي من يودك ولو حاد=واخطا ومثلك ماهر ودبلوماسي
والله يجيرك من عسيرات الانكاد=ينير دربك من شتات وعماسي