[داعي الشوق]

مل عينٍ ساهره طول ليلي ما تنوم = من هموم ٍ زاحمتني و قلبي في شقاه
كن في جوفي لواهيب و رماح و سهوم = آه يا حالي و صبره على الحظ ورداه
كنى اللي فى دجى الليل تسري به نجوم = ذاق من درب الجهد و العزاير ما كفاه
في صحاري البيد تغشاه لفحات السموم = لين غابت شمس يومه و خافيها عناه
اشكي الآمي و الاحزان في جوي تحوم = مثل طيرٍ من عنا الجوع حايم في سماه
صح ذا الدنيا دنيه مداها ما يدوم = يهتويها ضايع الفكر لو زانت معاه
تضحك لياليها بسن النكايـد و الهمـوم =لو صفت لك يوم شانت لك ايامٍ وراه
يانجوم الليل هاتي من الغالي علوم = صافي الاوجان جافي ولا ادري وش بلاه
لو يروف بحالتي كان له قلبٍ رحوم = بلغيه اني من البعد ذابحني غلاه
اعشقه و الشوق فيني تزايد كل يوم = هو ملك قلبي و روحي و ساحرني هواه
لا نهض من مجلسه كل من جالس يقوم = كامل بالزين و الحسن يوم الله عطاه
من يلوم القلب يالله عسى حظه يلوم = يا عسى من لوعة اهل الهوى يلقى جزاه

********