عيون المها يا نجد بالسحر صوّبن = غريبٍ بدرب الحب تاهن ركايبه
رمته الليالي في بحور من الهوى = ولا صار يدري مدّها من جذايبه
وموجٍ ورى موجٍ بها الموت والبلا= تحطّم حنايا القلب تشعل لهايبه
يدوّر بدربه من يشيله من العنا = ولا حدٍ عطاه البال حتى قرايبه
يقولون وش ودّاك يالطير للمها= مدامك رهيف القلب .. هذي تبايبه
الا يا سبب بلواي والحزن والشقا = علامك تركتِ الجرح والروح ذايبه
حلالٍ بشرعك طعنة الروح بالقنا = وحرامٍ على قلبي يعاتب حبايبه
حرامٍ عليك احرم وفي عطفك الدوا = نزيفي يتزايد كيف تاقف شخايبه
سقى الله زمانٍ راح بالسعد والهنا= فحلو الليالي ساقها مع هبايبه
ولا عاد باقي غير ما سبب العمى = عجاجٍ كتم نفسٍ شكت من مصايبه
إذا ضاق صدري ارفع الطرف للسما = ونادي الهٍ يدري الحال عايبه
اناجيه وادعي يفرح القلب بالمنى = ولو لحظةٍ بالعمر فالشمس غايبه
واذا ما تهيّا لي اوصيّك يالمها = تقولي يحطوا فوق قبري نصايبه
لعلك تذكريني اذا ذعذع الهوا = شمالي بنجدٍ والحيا في سحايبه
وزان الربيع وشفتي القبر بالضحى= فصلّي على من راح وانتي سبايبه