[ناصر عبيد الهواوي]

انا الليلة لبو متعب نويت ادز برقية=عسى الله يحفظه للدين عز وذخر لأوطاني
ابا اشرح له مجالات العمل واثارها فيه=وزيف السعودة كلن درى به قاصي وداني
انا عاطل وادوج فالمحلات التجارية=واشوف الموت من زود القهر يا سيدي جاني
محلات الملابس للحضارم واليمانية=ومعارضنا الكبيرة صارت إلسوري ولبناني
وسوق الماشية خليط اجانب مع حرامية=ونقلياتنا راحت لبو جخة وسوداني
ومحطات الوقود افغان نسبة مية بمية=ووضع التكسي وسوق العلف للكل قد باني
وكل اسواقنا غش وتستر وازدواجية=مراقبنا مريض وصاحب المشروع وجعاني
ولو جيت اشتغل بالسوق ماباليد خرجية=ولو جمّعت لي قرشين جاها الفين دياني
لو اني في بلدهم فوق راسي شلت صفرية=ابيّع حب فصفص من طرفهم شفت حقراني
نعرف ان التجارة والمتاجر للأفندية=لو ان السير من صلب الحديد الى اندهن لاني
وراح العمر لا حصّلت لا هاذي ولا ذية=من العام العرايض مرسلة والرد ما جاني
وصلى الله على الهادي عدد ما ناح قمرية=وما غنت حمامة من على لدنات الأغصاني