[الطائر المهاجر]

انا من نجد واتعبني هواها = اذا مريت من وادي حنيفه
بعد ما كان ينعشني صباها = غديت آطق لطمه لو خفيفه
خصوصا لا تعدّيت "المصانع" = ابي الحاير احس الجو جيفه
بعد زحف الأجانب دون رادع= وعاثوا بارضها العذرا العفيفه
فهذا الماء غدا بفلوس يشرى= وراعي "سدر" اسعاره كليفه
ولو هو ماخذه ببلاش واثرى = تحمل يالمواطن ما يضيفه
واذا من قلت يا أهل الصيانه= يجونك لا الموظف زان كيفه
يقولون البلى لاهل الميانه = قمايم تدخل المجرى مخيفه
وشوف العين شفت اكياس تقلع= من الماسورة الأم الضعيفه
واذا من وصلت الفاتوره ادفع = ولو عدادهم واقف رفيفه
واذا مضطر تمشي في الشوارع= فحاذر من مطبات عنيفه
تكسّر موترك لو كنت بارع = وقلبك ما توقّف عن وجيفه
والى من قلت لا ويش الدوافع= يقولون المفحط والهتيفه
واذا موترك سرق فلا تنكد= فغيرك كثر لو تسمع غريفه
على التشليح بامرك لا تردد= ودور في القطع تلقى الطريفه
واذا حظك بعد مده تجهد= لقيته واقفٍ من بعد عيفه
واذا طب الحرامي وسط دارك = فحاذر لاتطخه أو تخيفه
تعاون انت وعيالك وجارك= على صيدته في خطه لطيفه
ولا تضْربْه او منْك يتضرر = ترى تسجن على ادنى نزيفه
واذا من صار لك حادث مقدر= فليا تنتظر ياصل عريفه
تسامح كان تقدر لو تعذر = ولو مخطى عليك بكل حيفه
وترى مركبك بالدتسن ضمانه= فكلٍ ما يواطن شوف طيفه
وخل الفشخره تسلم امانه = من اللي ناويٍ غدره وزيفه
الى من شاف موتر حيل غالي = نصاه بخردته يفرح وليفه
يبي يُصدم ويقبض سعر عالي= ولو موتره ما تسوى لليفه
واخيرا لو تبي للنصح تسمع= تعيش بقريتك عيشه نظيفه
ولا تبغى المدن في القرش تطمع= مدام الاجنبي يلعب بكيفه