[مسلم عواد العميري]

لاماتوا اهل الطيب واهل الكرامه=ماينفع المعروف مع باقي النـاس
مثل الذي يزرع بسبخ الرغامـه=والايدّور ميّ في ذيك الاطعـاس
بعض العرب في هيبته واحترامه=تلقاه طيب خلق صادق بالاحساس
مثل الجبـال الراسيـه باستقامـه=ثلثينها بالارض يبقى لها سـاس
والابعضهـم للآسـف كالنعامـه=يحساب حاله فاز لادرّك الـراس
الثوب والمنظار وايضا العمامـه=ماهي لمقدار الرجاجيـل مقيـاس
الـى بغيـت العـز دور مقامـه=يسير لك وزن ومعزه ونومـاس
والى عطيت العلم امسك زمامـه=خلي حديثك مثل حبات الالمـاس
وان شاقك امر الخير اصعد سنامه=الخير بر وراعي البـر نبـراس
كم واحدٍ يعطيك عرض ابتسامـه=لكن يبيّن موقفـه ساعـة اليـاس
كم واحدٍ يظهر غـلاك بكلامـه=وهو يجرّعك المذلات في كـاس
من رافق الطيـب يعلّـي مقامـه=ومن رافق المفلس يُبشّر بالافلاس