بالعالم الثالث بجزره ومده = تلقى فساد وظلم في بعض الاقطار
لو الحكم عادل ولا فيه قده= حوله بطانه بعضهم مصدر اضرار
يسرق وينهب ما لقى تحت يده= ولا صار حوله يظهر الود قنطار
يظهر له ان الشعب متخم بمده = وكلٍ رصيده واصلٍ حول مليار
منافقٍ خسرٍان منهو يعده = رجل المهمه مخلص بكل مشوار
وبامره يصدر امر لو كان ضده= يثير شعب مسالم دون مقدار
يفرض عليهم ما يبي بكل شده=ويجوّع العاطل وغيره لينهار
والشعب لا من جاع محدٍ يرده = يثور كالبركان من غير انذار
يتدخل الطامع بداره وحده= باسم حقوق انسان يلقى له اعذار
ينهب لثروات البلد من يصده = والكل عبدٍ له على كيف يختار
فالحاكم العاقل يفكر بجده = يغسل بلاطه من خبيثٍ ومكار
يكسب رضا شعبه بعطف وموده= ويقرب الصادق بجهره والا سرار
من كل رجلٍ كفو مافيه نده = علم وامانه من رجاجيلٍ احرار