[الطائر المهاجر]

لا صرت تقضم مثل حبة شعيره = تهضم وتذمم مالقت أي تقدير
بعالم غريبٍ في نفوسٍ صغيره = فارفع مناحيها وحط التدابير
فالوقت غير الوقت في كل سيره= والخلق غير الخلق مبدا وتفكير
تكشف معادنها بلحظه قصيره = واللي بظنك ماس تلقاه قصدير
لا خلق يمنعها ولا ادناة غيره = كل ما تبي جاه ووجاه ودنانير
تخونها اهدافها لو ستيره = وتدري بها في كل ورد ومصادير
والضب لامنه فقد للبصيره = تلسعه حيه لين ما يحس تخدير
يطرد وراها مثل فاقد بعيره = حتى يطيح بجفرةٍ دون تحذير
مكسور لكن ما تفيد الجبيره = ويحس في جواه وخز المسامير
وتبدا تصرف في حياته تديره = وهو يتنازل لين ينصى الدحادير
ياكل بنفسه في حياة حسيره = ولو ثار دمّر مثل نار واعاصير
يشيل جرحه ف الليالي العسيره= يخشى على غيره من ادناة تأثير
غلطتك يالشاطر تراها خطيره = من لاتوقع طاح ما عيّن الخير
اما تقبل فانت راع الجريره = والاّ تفل الجنح بالكون كالطير
وشكوى لغير الله بوقت الهجيره= تحرقك زود ولا ترد المقادير