ياليل قلي اسمك الاصـل ياليـل =وبيّـح لنـا باسـرارك الداخليـه
اهل الهوى منك غدت كالمهابيـل=والابري والناس تضحـك عليـه
قال اسمي الاحزان والهم والويـل =يعرفني اللي جـرب المـر بيـه
وكلي عنا مع غربله مع بهاديـل=ويشهد لي سهيل وزحل والثريـه
ومع كل ذا يقبـل عليـه مقابيـل=بالليله الوحده يجي خمـس ميـه
ويشكو علىّ همومهم بالتفاصيـل=كلٍ يقـول جـروح قلبـي نديـه
مايدروا اني طافحٍ منـي الكيل= انا اسود وهـم سوّدوهـا عليـه
وظلمة سوادي تاخذ الهم وتشيـل=وهم يحسبون اني لهـم صيدليـه
دموعهـم ماتنمسـح بالمنـاديـل=لوهي بوادي ياعرب سـال بيـه
تكفون يااهل الحب يكفي بهاديـل=ماعاد ابقبل مـن طرفكـم شكيـه
منكم نجومي تظهر شوي وتزيـل=كني نهار وشمس ماهـي مسيـه
لوتعرضوا كل الشكاوي على النيل=لاسار نهـر النيـل نـارٍ جحيـه
مير اسمعوا يااهل الهوى يامعاميل=ماني لكم راعي ولاانتـم رعيـه
حمل الهوىشلته من ايـام قابيـل=انـا قديـمٍ بـه ولـي اقدمـيـه
اشيل حمل الناس وحدي ولااميـل=وكثر العذاب الشين سيطر عليـه
كني حمامه طايـره فوقهـا فيـل=حط الرسن فيهـا وشـدّ الحويـه
قامت ترفرف كنها فـي محابيـل=تشكي دموع ودمعها صـار ميـه
والحين ماخاطب صويب الخلاخيل=اخاطـب اللـي مايشكـا عليـه