على كثر الهموم اللي تحاصرني يمين يسار= اقاوم غير من همٍ بقى في القلب له كيّه
يطير النوم لامنه عصف في داخلي إعصار = واعرف ان السبب حلمي مع اللي جاهلٍ فيّه
صحيح الحلم من طبعي واذا من ثرت مثل النار= تحرق الرطب واليابس وتبقى ليلها حيّه
ترى حلم الرجل اكبر خطا مع ناقص المقدار= يشوف الحلم به ضعفٍ ويجزى الحسْنه ابْسيّه
وعلاج الشر ما ينجح بغير الشر مهما صار= فبادر قبل يستفحل فلا تعرف حراويّه
واذا منك ضربت اوجع ولكن لايبين غبار= وطخ الذيخ والحصني يهابك ذيب في فيّه
ولكن حكّم لعقلك ولا تدوّر ضعيف اعذار= ترى رب البريّه عالم الأسرار والنيه
فربك ما يقول ابدا بشر ولا تكن جبار= ولكن من بدا بك عامله بالمثل والهيّه
فسن بسن والبادي بشرّه عن قصد واصرار= اذا من تتركه لابد تتمادى خطاويه
ولو حتى قريبٍ لك مدامه في حقوقك جار= فردعه واجبٍ من دون لاعطفٍ وحنيّه
ومن ينصر اخاه بظلم لابدّه من الأشرار= مادامه يدفعه للشر تساوى الخي مع خيّه
واذا منك عرفت اللي ورى الجدران يشعل نار= وينفخ من يبي من قاصر الخبرات من غيّه
تتبع وين خطواته بدت في اول المشوار= ترى قطع الذنب ما يقتل العقرب ولا الحيّه
مثل هذا جبان وكل ما يفتل ورى الأستار= واذا من كشف في ستره غدا حرباة ماطيّه
بدا يتقرب بهرجٍ كأنه ناصحٍ لك بار= ولو ضحى بمندوبه وجاك بكل حبيّه
يبي لك توقعه في شر اعماله بلا آثار= ويصبح عبرةٍ للي مشى بالدرب من زيّه