البارحه عيني جزت تالي الليل = من حلم عاودني ولا دري بتاليه
مثل الذي واقف ولا عاد به حيل = عند البحر والناس بالعوم تغريه
فكّر يطافش مثل بعض الرجاجيل= لكن سحبه المد والموج يخفيه
ذبّت عليه عجيّزٍ حبل من تيل = وقالت تمسك فالبحر منت قاويه
وجرته عند الشط واعطته زنبيل= واقفت ولكن ما درت وش يلاقيه
لما تنبه شاف به شبه قنديل = مهمل له سنينٍ ولاحدٍ بباغيه
نظفه من ما به بكل المناديل = عله يعينه في دروبٍ تجافيه
وعلقه في الروشن بعزٍ وتدليل = يفخر بنوره ما يبي من يطفيه
ويرجي عسى يولد بكل التساهيل= مثله مثل قدْرٍ تذكّر طواريه
يومٍ "جحا" خطّط وفكره بتشغيل = ورجّع قديره من حيولٍ يغبيه
وبالفعل يولد له طقوم وتشاكيل= سرجٍ تعم البيت والنور ترهيه
لكن طلع تقليد والصنع به ميل = مسرع خرابه مالقى من يداويه
قام يتعبث به عسى بعض تعديل = متمسكٍ به ما يبي يوم يرميه
حتى بدا يحرق ثيابه مع الشيل = ويرمي شرر للسرج يمكن تجاريه
والسرج ترفض مايبي من تهاويل = الاّ سراجٍ طاوعه في مماشيه
قرّر معه في خبث بالبيت تنكيل = وحرْق السقوف العاليه من مبانيه
سراجك اذا من صار تقليد فالويل= للي يثق به جاهلٍ عن حراويه