سريت بليل مدري به عليّ وطوّل المشوار =ابي شرق وخذاني الدرب مدري باتجاهاتي
وطال الدرب والغربه على من يجهل الأسفار= ادوّر خطوةٍ تاهت تخاويني بمتاهاتي
واحاول اقنع ايامي تساعدني على الأقدار= لعل الليل يتكرم ويأذن للفجر يأتي
مشيت وحفيت اقدامي ولا حسّيت بالصبار = يجرح ورد خد الصبر ويوقظ نايم اشتاتي
عطش نشّف شفاه الصمت واحرق باللضاء الأطيار= تنادي من يساعدها ولو في بعض دعواتي
سألت الله يجيب المزن تطفي لاهبٍ كالنار= شكت منه القلوب اللي تعيش بمثل آهاتي
سحابه عجلةٍ تمطر وتنبت في القلوب ازهار= وتنعش قلبي الظامي بعد طول المسافاتي
وانا واليأس قدّامي يحاربني بكل اصرار= ولا صوتٍ يناديني ويحيي ميّت رفاتي
من الروعه ارتبك قلبي وانا اللي ثابتٍ جبّار= حقيقي ما اسمعه والاّ خيالٍ من خيالاتي
نظرت وشفت لي ريمٍ جفولٍ يطمر الأشجار= الا ياسرع ما وقف معه قلبي وخفقاتي
الا يا طرفها القاتل دخيلك لا تدوّر ثار= انا مقدر على سحر العيون يشلّ خطواتي
خطتني الطلقة الاولى ومرت كنها إعصار= رمتني الثانية حسّيت شئ بعثر لْذاتي
رفعت الرآية البيضا ونا مسبوه باللي صار= خذتها وكتفت قلبي على نغمات نبضاتي
" من أنت ، ووين متوجّه ، تكلّم ما ابي إنكار"= "وش اللي ادخلك جوّي بلا استئذان يالآتي"
تهدنني بنظراتٍ تشع السحر والإبهار= وتطلب مني اتبعها ولا ابد بالسؤالاتي
مشينا وين.. ما ادري ..ووصلنا بآخر المشوار= لخيمه من ورق صبار لا عمد وأساساتي
وحورٍ كالدرر تخطف فؤاد العاشق المحتار= يضيع القلب مايدري رسوّه بأيّ ميناتي
حقيقه او خيال اللي اشوفه اوعمى ابصار = يحيطنّي بناتٍ كلهن بالزين آياتي
وش اللي بس جمّعهن بخيمه ما تردّ غْبار = ولاحدٍ حولهن يحرس بصحرا جوّها عاتي
ادقق في عيون الحور ابفهم خافي الأسرار= ولاقي دمعةٍ نشفت من أيام وسنواتي
تنقل بينهن في صمت وتعطي للفهم إشعار= اسيراتٍ ولو ضحكن ولايحتاج اثباتي
وعجوزٍ تمتطي صهوة حصان الكره والإجبار= ومعها سوط من شافه عطاها اجمل تحياتي
رقيقاتٍ لها يمشن على دربٍ لهن تختار= وحتى في دروب العهر او خون الأماناتي
اطالعها وشوف جيوش جراره من التتار= تحيط بخيمةٍ ماتستر افخاذ البنياتي
عطتهن امر تكفيني بعد غسلي من التيّار= فانا في رأيها خطرٍ عليها والأسيراتي
ونخله يابسه بالدرب عطتني للأمل تذكار= وقالت لا تخاف الله معك في كل لحظاتي
ولكني انا مكتّف وش الدبره ترى محتار= نون غسلي وتكفيني ولا تنفع حيالاتي
ومثلك يابسه مافيك لا فودٍ ولا اضرار= لهذا بس ادعي لي ونا بدعي بدعواتي
الا يالله تفرجها الا ياعالم الأسرار= تعرف اللي نوت فيني العجوز وكل نياتي
وانا ادعي وهي تدعي ولا غيمٍ نشا باعصار= وبرق لاح بالدنيا على كل اتجاهاتي
حرق ذيك العجوز وخيلها والسوط والبسطار= وصاحن كلهن فرحه بعد طول المعاناتي
فلا من قوةٍ تبقى مدام إن الزمن دوّار= فرب البيت ما يهمل فنصره لازمٍ آتي