[الطائر المهاجر]

كتبتك بقلبٍ غير قلبك فلا شرى = ولا يعرف الخفرات سمر الجدايل
هويتك وانا ادري الحظ لو جامل الورى= تعوّدت تنكيده على الدوم مايل
انا ادري بحبك صادقٍ ما به افترا = وتدرين حبي ما يبي له دلايل
انا من عرفتك ما تهنيت بالكرى = ولا طلت في دنياي للسعد طايل
اطارد سرابٍ لا لحقته ولا درى = بظميان يركض في سموم القوايل
كبرنا واشوف الحب بالوقت يصغرا= ولا كننا في يوم نرعى المخايل
بديتي مع الأيام تنسين ما جرى = تبي تبعدي عني بشتى الوسايل
عذاريك كثرت وش بقى اليوم ياترى= وش اللي حصل قولي ترى الشك زايل
انا بغير قلبك ما افكّر على الثرى = لحبك ولا لغيره اشدّ الرحايل
احبك واحب الكون لاجلك ولا طرى= ادور بديلٍ لو لقيت البدايل
فليش المسافه بيننا اليوم تكبرا = تفرّح بها الحساد واهل الختايل
تعالى وشوفي كل شيٍّ على جهرا = وضوح الحبايب من جميل الخصايل
اذا كنت انا اخطيت من دون ما اشعرا= فمنك العفو ياسابقه بالجمايل
واذا كان هرج الناس لابدّ نحذرا = ترى من نقل لك قال عنك القوايل
تعالى نجدد حبنا قبل يضمرا = فحبٍّ بلا تجديد بالبعد زايل
تعالي لقلبٍ من بعادك تفطّرا = يبي شوفتك لحظه ولاهوب طايل
فحني عليه شوي فالعمر يقصرا = اخافه يودّع قبل لم الشمايل
ترى القلب لامن حب للروح سخّرا= تحب الملا والوقت لو كان مايل
وترى قلب ما به حب احسن له الثرى= حياته وموته تستوي بالمثايل