من اشعار اخي المرحوم عبدالله حمد رحمة الله ردا على ابيات مرسلة لي منه للأسف ابياتي غير موجوده لدي حاليا في حال العثور عليها سوف ادرجها لاحقا
البارحة هاضت على التفاكير=والقلب هاجوسه بعيد مداره
يمك ولايمك وكني على كير=وروابع المبلي وهمه اخشاره
ابيع واشري واخذ الشور واشير=وأديورالافكار في كل حاره
حتى المنادي صاح في الناس تكبير=وباج الضياء المشرق بعسجد صفاره
قربت من رمث الدعايث جذامير=وشبيت نار مثل ضو المناره
وسويت في شلق الثعاب المخاصير=مايقعد الدايش ويبعد اخواره
فنجان بن مقدر فيه تقدير=العانس العذري تمنى اشعاره
اغديه يطفي في الظماير سواعير=خطر رتاق القلب تفتق استاره
واحضرت بوكي والقلم والمساطير=وديونت من زين المثايل عباره
رد علة نسل الكرام المناعير=اخوي جعل الله يعمر ادياره
اللي شكى من دورة الوقت تغيير=ونفسه على الماضي كلتها الحساره
الامس غير اليوم صورة وتدبير=والغد يأتي والفلك في مداره
والأيام حبلى والليالي مداوير=وميزانها عيت تساوى احجاره
والصيد راح وراح وقت التسايير=والجار ماينشد عن أحوال جاره
واخوان نوره جندوها طوابير=ووزيرنا اصدر عليها قراره
محضور للشوزن وممنوع بالطير=وخصا على الارنب وطير الحباره
من عالي المندق الى ديرة الزير=جو وفلا متناوبين النطاره
بالطايره والسايره والنواطير=وكل مع الثاني ورهن الاشاره
بالميمرون معممات المثاغير=ومدافع تجعل هدفها دماره
وماعاد لك مخراج يافاتحة خير=واعرف ترى الذله لمثلك شطاره
والجيب خله واطلب الله تيسير=وشوفه على بابك يزول الكداره
ومنك السموحه كان في القاف تقصير=واسلم عسى ايامك سعود وبشاره
ومطهر الكعبة من الشرك تطهير=عليه اصلي واطلب الله جواره
------
تاريخ الابيات في 1410/12/20