[الطائر المهاجر]

كلما درت فكري في زمان الغرابه = شفت شيٍ عجيبٍ واضح للضرير
من مشى باعتدالٍ ماشيٍ وسط غابه= مالقى له خوي ولا لقى له نصير
غابةٍ ما بها ياكود بعض الذيابه = وانقسام الخلايق بالفكر والمسير
قسم متشددٍ ف الدين حامل كتابه= ضد اية تطوّر لو بقدرٍ يسير
وقسم مترهبلٍ لو شفت قصّر ثيابه= كل همه يبي الدولار مهما يصير
وقسم لو كان عالم مامشى في صوابه= خادمٍ للقوي ولو ظلم للفقير
وقسم متحررٍ للغرب وجه ركابه= وصار مثل الغراب اللي عجز لايطير
كل همه يبي المنصب ولو بالنصابه= كل شيٍ يبيعه ميّت للضمير
وكل هذا يفسر وضعنا بالخيابه = من فساد نشوفه في كبير وصغير
من هوامير تسعى للسرق والنهابه= ومن دعاره ومخدّر وانتشار الدشير
انفصامٍ بفكرٍ والعقل في غيابه = وكل واحد بوجه ووجه وسط الهدير
لين صرنا شتاتٍ دون عز ومهابه = دوم ترتيبنا الأول بصفٍ أخير
لا نجحنا بكوره ولا بلعب الكعابه = رغم مليارات تصرف وضعنا ف الحدير
يالله اني دخيلك من زمن حد نابه = تجمع اشتات قومٍ ماوعوا بالمصير