[عادل العتيبي]

اتشرف بان أضع بين أيديكم القصيدة التي شاركت بها في الحلقه الاولى من برنامج شاعر العرب للنسخة الثانية في دولة الكويت

ويبدوا ان أحبائي قله لذلك لم يمهلني التصويت كثيراً رغم حصولي على المركز الرابع بتقييم اللجنه من بين 12 شاعر

ودي أبيّن ماطرى بالمختصر وأيضا المفيد=مير البلا من هاجسٍ أمسى يجر لحونها
لا قلت له أنت أكتفيت ؟ يقول لي هل من مزيد!= رسالته ترقا سما في مايلي مضمونها
سلام يادار الكويت اللي لها مجدٍ تليد=مجدٍ تعلّق في سماها وأستباح حصونها
لها مكانه وسط قلبي من وريد أليا وريد=والله هو العالم بنيات العرب وضنونها
مقدارها بقصى الضلوع العوج ماينقص يزيد=هي ثابته في وسط قلبي والضلوع تصونها
ولها مكانه في ضميري لا تحيد ولا تبيد=لو بادت قلوب الرجال وبيّحت مكنونها
كل(ن) يبادلها المعزّه من قريب ومن بعيد= وألها جمايل وافيه والناس ما يحصونها
جيت أتغزل في هواها وانظم أبيات القصيد=يالين أقنّد راسها وألمح بياض سنونها
وأهيم في وادي غلاها وأنظم العقد الفريد=وأعلّقه من فوق هامتها وفوق متونها
لو عنقها ماهوب عنق وجيدها ماهوب جيد=مير الوكاد إنا نبيع اعمارنا من دونها
أنعز جانبها ليامن لوّح الوقت الشديد=ناقف لها لا ركبتْ الجمرة على غليونها
إي والله الليله تمام / وحظي الليله سعيد=اللي روماني يمّها وأصبحت أنا ممنونها
يومٍ قضيته بأرضها عندي يساوي يوم عيد=لفيتها من ظمن ناسٍ من غلا يلفونها
على رواسي والعرب قالوا نفيد ونستفيد=وأن قاله الله تستقيم أوزانها وفنونها
مدام عندي للهقاوي شوح وعزومي رصيد=وأليا بغيت أكحل هدبها ماعميت عيونها
رد النظر وأبشر لك بصيدٍ ماهوب أيّات صيد=من شرد(ن) واضح صداها والعرب يوحونها
وانا زهيد بهذي الدنيا وابتركها زهيد=ماعشت لأجل ريالها وإلا لأجل مليونها
وآخر كلامي قلتها وأقول وأكرر وأعيد=أليا بغيت أكحل هدبها ماعميت عيونها

أخوكم عادل محمد العتيبي