(( المجلس ))
المجلس اللي فيه صجه ولجه= وإغياض وإمزاغى وهاجم ومهجوم
وتاجد به الجاهل ومن فيه رجه= ويجمع ردي من الرفاقه ومهثوم
وراعيه ماهو لطاعة الله موجه= من غفلة الزوار من الخير محروم
إن جيت في وسطه لاكنك بعجه= أو وسط بدل ذا يحرج وذا يسوم
لاهو بشفن لي ولاله اوجه= وإن جيت صوبه جيت عجلن وباقوم
ماهو بشرح ولا النشاما تخجه= كثير رواده مقاريد وارخوم
ماني مخلي غفلة فيه حجه= علي بنهارن يجعل العبد مهموم
جعله افدى اللي مجلسه له انوجه= لاجيت له تلقى المعزه ومحشوم
ملفى مناعيرن مع كل فجه= مايدهله ياكون قرمن وزيزوم
تلقى الدلال بهيلها اللي تمجه= ريحه ايشادي ريح عنبر ومشموم
وسوالفن ذربه ماهي بالسمجه= وتذكرك باللي خلقنا وقيوم
مافيه لامعالى ولى فيه صجه= وكبيرهم مافيه كبر ولا زوم
ونواجذن تضحك وهي مبرهجه = وطيبة خلق يرقى بها كل شغموم
والزين شوف الصيد لاطلع مهجه = خطوى اشقر جبر الثنادي وصيروم
لاشافه الخرب المكوبر ايرجه = وان طار ياتي به ولو دونه انجوم
وخوة نشاما مايخاوون دجه= ازلابتن لامال لاعز لاقوم
هذي طراة الروح والعمر سجه= والعبد تاليته وفاته ومعدوم
يالله ياللي له عباده توجه= يارازقن العبد والعمر محتوم
وياجاعل التيسر بعد العوجه= تغفر خطاي إن كان زليت في يوم
منصور منيخر الوذين المري