[الطائر المهاجر]

الا ياطير يمهاجر رفض ذل القيود وطار= يغنّي بالفخر مجدٍ تميميٍ تطرب لحونه
يبي حريته مهما مشى من اجلها الاخطار= رضعها مع حليب امّه ولا قدروا يفطمونه
تميمٍ جدّي الأول ترك للعالمين آثار = وكتب عهدٍ على ذريته لابد يوفونه
معزّة نفس ما تشرى ولا تنباع بالدينار= ونبضٍ بالشهامه والكرم بالكون يحيونه
بنى حصن الرجوله شامخ لأحفاده الأحرار= وملاذٍ للذي يبغى من العدوان يحمونه
هل الطولات هم ربعي لهم في ضامري مقدار= شجاعتهم حمت جيرانهم والخصم يرهونه
الى من ذكر لي مجده احس بداخلي كالنار = حمم في كل نبضاتي على تاريخ يخفونه
زمان البوم ما يبغى لنا في عالمه تذكار= نسوه وهمّوا بدفنه بليلٍ بان بمجونه
لأنا نرفض الذله لغير الواحد القهّار = ولا نسجد لغير اللي جميع الخلق ينصونه
ولكن باقيٍ بصدورنا كالنقش بالأحجار = يذكّرنا سنين العز بالشريان مدفونه
لك الله يازمان ينكر الطيّب من الأخيار= غدى مجد التميمي ماضيٍ وشلون ينسونه
وغيره ماخذٍ حقّه ولو هو وافدٍ خطّار= مدامه خادم ياصل ويلقى من يخدمونه
قدرنا إنّا بقينا احرار ما نمشي مع التيّار = ولكنا على المبدا نموت و نرفع حصونه