[الطائر المهاجر]

يشيب راس الفتى ما شابت همومه= يكبر وتكثر وتتعبه ببلاويها
تغار كالخيل تطرد لانوى نومه = ولا من صحى جات له تعلن تحديها
اهموم وقتٍ ردي بانت علومه = فيه الذيابه غدت تخشى حصانيها
كم وافدٍ وصلنا متسلف هدومه= مع التستر غدا متحكم فيها
مؤسسات كبار خلفها بومه = يحمي الاجانب وهو بالاسم راعيها
يوظف على الكيف من اخوال وعمومه = ويرسل ملايين لبلاده واهاليها
وعيالنا كل واحد طاحت سهومه = معه الشهادات لكن وين باغيها
من دون "واو" وظهرمحدٍ بغى سومه= يعيش يومه بحسراتٍ يصاليها
بطالةٍ تنتشر باسباب مفهومه = فساد ماله حدودٍ في نواحيها
مابه رقيب وحسيب يحسب قدومه= دامه يحسّب حسابات يداريها
لو كان يخلص تلقّى الهوش او لومه= ويمكن يهمش ويخسر في تواليها
يسكت على اللي يشوف وياخذ رسومه= مهوب ملزوم يصلح من ترديها
الفقر والجوع مثل الارض ملغومه = ياسرع ما تنفجر محدٍ يطفيها
والداء لا من بدا في راس منجومه = ماله سوى الكي كود انه يداويها