[احمد الكثيري]

السلام عليكم

اتيت اليكم من جديد وفي جعبتي صوت من روائع الشاعر الكبير اخي الغالي

محمد العمري وهي موجه لي شخصياً وصدى مني آمل ان تحوز على رضاكم

النصوص

محمد العمري

نعمين يا شهم عديم العذاريب =يا نسل قوم في المواقف شديدة
يا طيّب ما شفت منه سوا الطيب=يا صيرميٍّ له مواقف فريدة
أرفع لك البيضاء بروس المراقيب =ضع صورتك وارفق بهذي القصيدة
يا بن ا لكثيري لك علينا مواجيب =واللي مثيلك لازم إنا نزيده
يا بو جلال أحرجتني بالتراحيب =وخليت شعري يستمر ابجديده
المرجله ما هي بشيل المشاعيب =لكن جت صوب ا لكثيري تريده
يا من على شأني تلقى المتاعيب =من دون علمي قدم أشيا مفيدة
يا طيّب المبدأ بعيد عن الريب=عسى عدوك يشتكي حر كيده
معروفكم يبقى وسام على الجيب =مادام دم اصويحبك في وريده

وكان ردي المتواضع على الشاعر فريد القصيد

بذكر الله ابدا عالم الجهر والغيب= الكون كله وماحوى تحت ايده
حلاّل فكاك العقد والمناشيب = ولينا وقت الظروف الشديده
يا الله يامن تستجيب المطاليب =اطلبك حقق يا ولي ما نريده
وابدا وارحب فوق مليون ترحيب = إعداد ما ينشر بوسط الجريده
يابوعلي جاني خطابك كما الطيب=فاحت عطوره من ديار(ن) بعيده
وقمت اهلي به على الفور واجيب=لو ان رصيدي ما يساوي رصيده
قلت ازهموا عالفور كل المناديب= وdhl والفاكس وساعي بريده
واعطيه شوقي يحمله والمكاتيب=يوصله لهل العلوم الفريده
راعي الكرم والجود راعي المواجيب=راعي الشهامه والعلوم السديده
ابو علي مزبان كل المعازيب=كلاً شهد له بالفعول المجيده
عزالله انه عزوتي والمكاسيب=لا دندنت للحرب ناس(ن) بليده
يدوس خصمه ما يخاف العواقيب=لطام لاخصامه وناس(ن) عنيده
يرقى جبال(ن) عاليات المراقيب=روحه لضيفانه جعلها زهيده
هذا حروفي واعتبرها تجاريب= يا اللي رصيدي ما يوازي رصيده