[الطائر المهاجر]

غناء الفنان فهد مقام حجاز

صارت تحاصرني هموم الليالي = كلما بغيت اسلى يعيّن عليّه
همّ العيال وهم الاحفاد تالي= وهم الليال المقبلات الخفيّه
في وقت ماهو لي ولا له بحالي= ما ارتاح به غيرالظهورالقويّه
ولاّ منافق ماشيٍ بالختالي = ياثق به اللي يوصله للبغيّه
وأنا قوي بحيل عزّ الجلالي= اللي عليم بحالتي والطويّه
دربي وضوح ولا عرفت الميالي= عزيز نفس وما رضيت الدنيه
لو قصّرت دنياي ماني لحالي= مثلي كثيرٍ بالعنى والسجيّه
صحيح انا اتألم لوضع العيالي= لاشفتهم كلٍ وحاله رديّه
مابين عاطل دون ذنب وخمالي= ومابين من دخله ولا به بقيّه
يقضي بتسديد الفواتير تالي = ورْسوم توخذ بين روحه وجيّه
وبيتٍ اجار ومصرفٍ صار غالي= ومظاهرٍ تفرض علينا الأذيّه
والمشكل إن البعض يجهل حوالي= يظن عندي ما يغطي الثنيّه
اموظفٍ وصل الرجوم العوالي= مثله جمع ثروه وحاله مليّه
مايدروا إنّي والأمانه خصالي= عفيف جيب وما قبلت الهديه
وما اكلتهم إلا حلال الزلالي= مخافة الله منهجي والهويّه
وراح العمر قانع برزق الحلالي= ازرع بهم خير السجايا النقيّه
درستهم ووجّهتهم للمعالي= والرزق عند اللي خلق للبريّه
فالرجل من وازن اموره عدالي= ووفّر حلاله لليالي الشقيّه
حتى يعيش بعزّته كالرجالي= في وقت ما ينفعه حتى أخيّه
القرش لا منّه نوى الإرتحالي= اقنعه يجلس لو عقلت المطيّه
وأن اغوتك نفسك لبعض الدلالي= باكل المطاعم قل لها ومعصيّه
وشلون ابامن والرقابه همالي= والأجنبي غشّه بعينٍ قويّه
آكل ببيتي ضامنٍ ما جرى لي= والبذخ والتبذير ماني خويّه
وإذا نويت السوق فالجيب خالي= إلاّ من اللي عن ضروره قصيّه
قرشك صديقك فاحفظه عز غالي= دونه تحس الذل صبح وعشيّه