[الطائر المهاجر]

يالله ياكاشف عن ايوب ما به = يا خالق الإنسان تعلم خفاياه
يامجيب دعوة مؤمنٍ التجا به= تفرج لمن همه بقلبه لجاياه
نارٍ توقّد بالحشى ما تجابه= بركان كلما اطفيه زادت شظاياه
مما اشوفه في زمان الخيابه= من شئ يدمي قلب صافي نواياه
غير نفوس الناس من كل لابه = ولا عاد تلقى من تسرّك سجاياه
عصر التحضر في طيوره تشابه= تساوت صقوره مع اردى حداياه
ركضٍ مع التيار تطرد سرابه = تاخذ قشور الغرب واتفه نفاياه
وكلٍ ولا هو داريٍ عن صحابه= اصبح يعاني منطوي في زواياه
هذا مريض ولا لقى له طبابه= وهذا المخدر طيّحه في هباياه
وهذا الطمع جره يكبر جرابه= لو بالحرام وعايشٍ في عماياه
يحسبه بالأموال وصل السحابه= يخفي بلاه وما بطن من خزاياه
يقلب على اهله لو هم اقرب قرابه=امه وابوه ومن طلع من غذاياه
وهذي عجوزٍ مهمله في خرابه= وهذا عويدٍ رمي تؤلم حكاياه
وهذا بإسم الطب ينهب نهابه= محد ردعه ولو تزايد ضحاياه
وهذا بإسم الدين يعلي قبابه= ولا من تتبعته تعرف لْرزاياه
خدّاع ماكر لاعبٍ بالذيابه = وكم واحد ووحده غدوا من سباياه
لاشفت هالأوضاع عشت بكآبه= واشعر بجوفي نار تشعل لضاياه
مرات كنّي من يحس بغرابه = يحصد بهمه ما نتج من خطاياه
لأنه على مبداه تمشي ركابه= يرفض يساير وقت تاهت مطاياه
والظاهر اني من خطا في حسابه = عايش مثل من يخدعنّه مراياه