حداني على بحر الهوى حظي المقرود= احسبي بخيص وجرني الموج لاعماقه
سبب من تعداني وانا واقفٍ مشدود = نظر لي بنظره شدت القلب بوثاقه
تسمرت مدري وش حصل لي تقل مصفود= برجليه قيد وداخله نار حراقه
احاول ابفهم وش تقول العيون السود= فيمكن بها مثلي الى الحب تواقه
الا يالمها الصيّاد من سحركم مصيود= تعالي وشوفي حال من حاله اشفاقه
تبعثرت في بحرك وانا من قبل كالطود= فلو ترفقي بالقلب يكفيه ارهاقه
كأني بها ضحكت وقالت بكل برود= انا افرح على مثلك اذا احرقت اوراقه
مادامك رهيف القلب لو تربطه بقيود = وتترك دروب العشق حاديه والناقه
وقفّت وخلتني ادور بقايا شهود= على عطرها المنثور ينعي لعشاقه