[عبدالله الشويمان]

السلام عليكم ورحمة الله وبركاته..
ايها القراء الاعزاء..وجدت هذه الابيات بين اوراقي لعلها تدخل مزاجكم..

نبهتنـي رنـة الجـوال ولجتنـي بلـجـه=يا ترى في وسط ليلي من زهمني من يكون
قلت ابسمع صوت منهو رجنـي الله يرجـه=مير يوم اني فتحت الخـط إلى صوتٍ فتون
مرهف الصوت انفتح له باب قلبي ثـم هجـه=غصب عني وانتشر في داخل القلب السكون
سلم وقال السموحه كان اقلقتك بضجه=قلت انت مضيعٍ ولا على شخصي تمون
قال معجب قلت والله قال والله لك موجه=قلت تكفى لا تدخلني متاهات الجنون
روح دور لك عشيقٍ غير عود فيه سجه=مقفين عمره وخله دوب نفسه لاتهون
قال لي يا شيخ ضنك لا يصير بعيد فجه=مطلبي عندك عسى عمرك يطول بلا ضنون
قلت آمر وش تبي كان اني اقدر دون حجه=اقضي اللازم ولا ترجع مخيَّب ومحزون
قال تكتب لي قصيده والحلا فيها تدجه=ودي اهديها باسمي صاحب القلب الحنون
قلت احاسيس استعاره ثوب ما يستر بعجه=مير شف منهو يبيع الشعر ويدور زبون
قال بعطيك المقابل كم تبي مبلغ وزجه=قلت انا ما ابيع شعري بس شعري لي يكون
وسكر الخط أمتضايق قلت يا ألله نجه=من صواديف الزمان ومن مكشرة السنون

عبدالله الشويمان-الرعد
في 5-3-1410