[الطائر المهاجر]

لا ياقلبي وش يفيد اللوم او كثر العتاب = لا ياقلبي وش يفيد الحزن او كثر الأسيّه
وش يفيد إنّي اراجع صفحةٍ سودا بكتاب= واتذكّر كل ماضٍ كانت جروحه نديّه
لو تحاول ما اطيعك انقشع ذاك الضباب = وبانت الأفلاك تجري مادرت بالجاذبيّه
كنت واهم ، كنت ضايع، كنت اطارد في سراب= كنت واثق، كنت طيّب ، لاخصوم ولا قضيه
كنت ما أقدر افرّق بين حبل وبين داب = حتى في يومٍ لدغني ما يخاف الله فيّه
مخطيٍ منهو توهق نام باحضان الذياب = ناسي إنّ الذيب ذيبٍ لو يغيّر في الهويّه
والنتيجة يافؤادي انت واخطيت الحساب = احترق زرعٍ زرعته ولا بقى منّه بقيّه
ما تفيدك لو وليتَ ولا ترجّع لك شباب = ما يصيب إلاّ نصيبٍ قدّره ربّ البريّه
فابتسم للكون واصبر ترتجي حسن المآب= يفرج الله كل همّك بين صبحٍ او عشيّه
واعمل المعروف وانسى لا تحرى له جواب= غير من ربٍ كريمٍ عالمٍ كل الخفيّه
واعرف إن الوقت غيّر في البشر شيب وشباب= انطفت ذيك العقيده وخبثت ذيك السجيّه
تحكم الناس المصالح في الذهاب وفي الإياب = كان ما تعطي ما تاخذ حتى لو حالك رديّه
وكان منتَ ذيب تفرس ما تعيش بوسط غاب= وكان قلت الحق تخسر محد يرضى بك خويّه
لعنبو هالنفط حوّل كل شيهان لغراب = لعنبوها من حضاره افقدتنا للهويّه
ليه نحقد ، ليه نكره ، ليه نحيا في عذاب= ليه ما نصفّي النفوس بهذه الدنيا الدنيّه
وليه تخدعنا الحضاره بسم في شهدٍ مذاب= نحسب إنّه دوم بلسم للجراحات النديّه
والنهايه في تخبط ما عرفنا للصواب = ضعنا من بين الخلايق في زمان العنجهيّه
ليه ما نصحح مسارٍ اتضح إنه سراب = كم خدعنا في بريقه وكم خسرنا من قضيّه
لو رجعنا للعقيده ينتهي كل المصاب = دامه مقدّر علينا لا اعتراضٍ للمشيه
ونعرف الدنيا قصيره تنقشع مثل الضباب = عمرها مايوم دامت لاحد من كل البريّه