[الطائر المهاجر]

شيب راسي تحدّر وارتكز بشنبي = كل ما اقطع وحيده جا بدلها بديل
قالوا اصبغ ولكن بالصبغ مذنبي = مثل قطعه فخله لين يصبح طويل
ثم حفّه بخفة يدّ يترتبي = ولحيتك لايجيها غير طيبٍ اصيل
قلت توي وريعٍ داله بملعبي= لكن الشيب جاني بالغزاره جزيل
توي ابدا التقاعد فيه احبي حبي= وما مضى ما اشوفه غير عمرٍ قليل
معه شفت الوناسه داله كالصبي= لا طريقٍ غثيث ولا دوامٍ مليل
راتبي قانعٍ به والزياده ما ابي= كافي اللي مضى لي من تعب هد حيل
من بويتي إلى المسجد علاج ركبي= ادي الفرض وارجع دون قالٍ وقيل
وانتبز للفطاحل فاتح مجببي = من لفاني لقى المجلس ولا به بخيل
مجلسٍ للرجال وكاعبٍ راعبي= وكل واحد اصيل ولا بهم من دخيل
ولا تسلل خشاش للخنا يجلبي = ينتهي مثل فار بالشرك له عويل
ينضرب بالفليت ونفتح المهربي= ما نبي يوم يذكر في الفطاحل قتيل
ولو مددنا الحبال لماكر الثعلبي = نغسله كود يصحى كان ينفع غسيل
او على الهام يكوى كية مطببي= يحرّم انه يجينا لو سرى وسط ليل
فالفطاحل فطاحل من جهل يحسبي= رمز معنى الرجوله مالهم من مثيل