[داعي الشوق]

لا واهني اللى من الحب سالى = متريح باله ولا عاش بهموم
قلبه سليم من سهوم و نبالي = عايش و متهني ولاهوب محروم
ماهوب محرومٍ من عيون غالى = ولا طرا له بالهوى علم و علوم
ماهوب مثلي بس ساهر ليالي = أعانى اللوعات و احسّب نجوم
باسباب من جاله بقلبى مجالي = ريم ٍحسين الدل والنهد مزموم
ريان عوده والجدايل طوالي = هاف الحشى والخصر ضامى ومهظوم
والعين من رمشه عليها ظلالي = لا رف بأدنى العين صابتك بسهوم
حبه تمكن بي و ساكن ببالي = و انا بحب الزين ماني بمليوم
نصف الشهر يبدا القمر بالعلالي = متكامل بدره ولو حوله اغيوم
و تال الشهر يبدا يعوّد هلالي = مذكور و حسابه مدرّس ومعلوم
وانا حبيبى بدر في كل حالي = ما يعترف بحساب تاريخ و رقوم
حبيب قلبى كامل بالجمالي = ماله مثيلٍ بين الأشوام والروم
نجدية المنشأ وتاج الكمالي = من ساس عربانٍ لهم صيت وسلوم
ياما من المحبوب شي جرالي = حيرني الظالم وانا منه مظلوم
مدري غيابه ليه طــوّل وطالي = انا من المزيون والله مصدوم
أرجوك يا خلي تلطف بحالي = ما للهجر معنى ولا هوب مفهوم
لك مدة ما بان منك اتصالي = ولا وصلني منك يا زين مرسوم
ما قد هوى قلبي لغيرك ومالي = أنت الوحيد اللي له القلب مجزوم
يا غاية آمالي ويا راس مالي = لا غبت محشومٍ والا جيت محشوم