[ابو أنس]

هذه قصيدة كتبتها لأحد الإخوه وكان يحب البر والخلوة بنفسه أو بصحبة قله في نزهات بريه ولو قصيره
وفي أحد الأيام وكان الجو جميلا ممطرا وكنت أتمشى لوحدي بين الرمال والأوديه تذكرته فجاءت البدايهثم أكملتها فيمابعد وبعثتها له وقام بالرد عليها ولكنها غير موجودة لدي في الجهاز لأوردها .ولعلي أجدها وأوردها في وقت لاحق
أحببت طرحها بين أيديكم لتحظى بذائقتكم
فلكم التحية والشكر

باسم الله البادي على كل بادي=اللي رفع سبع(ن) ولا ركّز عماد
المعتلي في العرش ماله مسادي=ماله شبيه ولا مثيل(ن) ولا انداد
ابدع بصنع الكون رب العبادي=ويدبر الأفلاك من حيث ماراد
ارخى علينا نعمته بازديادي=ساق الحيا واسقى الفيافي والاوتاد
حتى جرى الحاير مشى كل وادي=واستبشرت به النخل والرجع زاد
واخضرت اراضي الحظر والبوادي=والبادية عند اهلها صارت بلاد
يابو سعد مني سلام(ن) وكادي=من خاطري سقته وهو سمح منقاد
ومحمل(ن) بالعطر ورد(ن) وكادي=والمسك والريحان والعود زواد
للصاحب اللي حولنا لو ننادي=قريب لكنه بعيد(ن) وشداد
يوم الزهر فتح وخف البرادي=والبر زان وصار للبر ميعاد
ذكرت حبك للرمل والشدادي=واشعال نار(ن) لو على قش واعواد
ياما حلى ضو(ن)من الرمث غادي=دخانهاله ريحه العود او كاد
وبراد شاهي قد غطاه السوادي=مركا على المجمار واسود وش عاد
في مهمه(ن) خالي من الناس هادي=معك وجيه الخير مافيه حساد
سمحه سوالفهم ولا به نقادي=لا ناقل الذمه ولا فيه نقاد
مزح وسواليف(ن) قدام(ن)جدادي=فيها طراة(ن) لو تكرر وتنعاد
ويا زينها لوك على جال وادي=تسمع هديرالسيل والخير يزداد
من مزنة هلت بوقت الهجادي =والصبح علت والعصر نو رعّاد
هذي مناة النفس هذا المرادي=وان كنت مخطي صحح العلم يا ستاد
منكم نحب المعرفه يا سنادي=يابو سعد عطنا من العرف ما فاد
والعذر منكم كان به نقص بادي=ما يكمل إلا وجه خلاق العباد
تمت وصلى الله على خير هادي=من بلغ التوحيد ما انقص ولا زاد