[الطائر المهاجر]

جيت للدنيا وحيد وارتحل منها وحيد= تاركٍ ما اكتسبته من حلالٍ او عيال
ودام هذا الحال افضل عيشتي وحدي بعيد= خير من ناس تدور للهرج قيلٍ وقال
او تدور للمصالح كود تلقى ما يفيد = وكان ما بك من فوايد ما تنزل بالسؤال
ولا سأل عنك حديهم بالخطا هرجه زهيد= كن مغصوبٍ وينهي كلمته باقصى العجال
كيف انت وكيف حالك من هروج اللي بليد= وفي امان الله احسن هرجته بعد انشغال
كيف كنا وكيف صرنا بين اجداد وحفيد= ما جنينا من الحضاره غير انواع الوبال
كل واحد كل همه كيف يعلي للرصيد = ما يفكر في حرام ولا يفكر في حلال
ضامره ميّت ولا هو خايفٍ يوم الوعيد= داخله نفس مريضه لو ملك ثقل الجبال
وده لو لحظه يحس انه بهالدنيا سعيد= غير مايقدر لأنه صار مدمن حب مال
لو يعيش بقصر فخمٍ فيه خدام وعبيد= ولو ملك اجمل جزر بالجنوب وبالشمال
ما جداه إلا علاج يجعله مثل الجليد= يخدره اوقات واوقاتٍ تشوف بْه الخبال
عايشٍ في صورةٍ للذات عنها ما يحيد= ناسي الذات الحقيقي ماعرف صدق الفعال
عايش بوجهين واكثر مر خادم مر سيد= ضابطٍ دور النفاق وكل مكرٍ بافتعال
ما تفكر بالنهايه يوم ماله ما يفيد = يمتلي فمه تراب ويبتدي وقت السؤال