[الطائر المهاجر]

انا ما شاقني ياكود ريم مشيته بركود = يداري الارض من تحته يخاف انّه يوطّيها
لمحته كالسحاب اللي تهادى ما اثار رعود= يبي البرّاق مايفطن ولا وجهته يدريها
مثل ريح الصبا لا هبّ حرّك في الغصن عنقود= معه عنقود قلبي ياملا ميّل نواحيها
جمال ما خلق مثله ولا هو هالزمن موجود = ولو لفّيت كل الأرض ادور من يجاريها
بليّا شعور تابعته اطالع في الرموش السود= سهم أوّل وصوبني ويعلن عن تحدّيها
سهم ثاني طعن قلبي ومن خلفه اشوف حشود= سهم ثالث وانا لاحي لاميّت اناديها
قتلتيني .. وقتل العمد حكمه في الشرع بالقود = ولكني انا بعفو اذا روحي تواريها
ابيهاتدفن بقلبك لها بين الضلوع لحود = لعل النبض من دفئه مع الايام يحييها
عطتني نظرةٍ منها فهمت القصد والمقصود = واذا خلفي وحوشٍ كلها بالشر تنويها
وعيونٍ شاخصه ترجف وتخشى يومها الموعود= تبسم للوحوش فخوفها بالدرب يعميها
نظرت لها ولا دمعه تترجم حظها المقرود = تبي الفزعه ولكن ما لقت من قال يحميها
تناوشها الوحوش وتفترسها والعيون شهود= تبارك ما حصل في السر والأسرار تخفيها
وفار الدم في راسي ابنخى حرفي المعهود= لقيت الحرف في سجنه ولا يقدر يواسيها
لتبقى دوم في قلبي احس انه ربط بقيود = بسحر الزين من حوريّة كل الحلا فيها
الا يالله ترحمها وترحم حرفي المؤود = وترحم حالة امثالي وتكفينا تواليها