[الطائر المهاجر]

وقفّـت بالشمس تبحث عن تكاسي = طفـلة تحمل طفـل بيدينهـا
محّـد وقّف ، وذاك الجـو قاسـي = منظـر أثر بنفسـي حينهـا
بخـردتي وقفت قلت لها لا باسـي = اركبوا، والدرب قولي وينها
قالت المشفى ، ترى ريقـه يباسي= بالهمام اسرع، وارخت عينها
وفي الطريق الصمت خّيم والنعاسي= والطفل غافي على رجلينها
اسرق النظـره وادقق في القياسي= لوهي امه ، ضمته لحضينها
وبالعجل خذته على الدكتور ناسي= احسبه طفلي ، وخايف سينها
قال ، أبوه ، وقلت عجّلنا يا قاسي= وهذي امه ، الحزن بجفينها
وصحصح الماخوذ في وقت قياسي= وانحدرنـا ولفته بردينها
والطفـل يلعب ضرب خط اتماسي=جـرّ غطوتها ، تكشّف زينها
مـدري برق لاح أو شب التماسي = من عيون الريم أو خدّينها
صرت مذهولٍ وبان لها انعماسـي= قلت لا ، تكفين لو تطفينها
وين انا رايح وحالي في انتكاسي= قالت اوصلنا وداري ذينها
الله اللي جايبـك يا تـاج راسي= تنقذ ابن اختي وتكسب دينها
لزّمت أقلط ، وهزّ العرض ساسـي= حايرٍ مدري شسوي حينها
وما دريت إلا وانا فـوق الكراسي= سـارح التفكير في تثمينها
ودخلت فيها الحيا ، بستر اللباسي= وجلست ، عيني تحاور عينها
العيـون تقول في صمت ووجاسي= ترسل الشارات تحكـي بينها
قالت عيـونه ، أحسه عز ناسـي= قـالت عيوني ابي تطمينهـا
لا تـوّرط يا فتـى حط المراسي= لو تثيقـل تفتهم تعدينهـا
في صراعٍ ، مبدئي يرفض يداسي = شلون ابيعه واشتري تكفينها
في متاهة حب في لحظة حماسي= او بلحظة ضعف في تحصينها
وقمت اودعها ،أحسب القلب راسي= واثره المصيود من تنشينها
قالت ادري الحب صادك بالحواسي= وصابني بالروح في تكوينها
قال قلبي انتهى العـام الدراسـي= والنتيجة واضحٍ(ن) تلوينها