الرجل لا عدد تبين علومه = مثل الشعيره بالقضم مذمومه
مهما بذل من جهد مع اولاده= الولد لامه حكمة معلومه
دوره مكينة صرف ما تتوقف = والكل حوله جالي لهمومه
ولا من فضت محد يبين عنده = يجلس لحاله يشتكي لهدومه
فلا كبروا الأولاد ما يلقاهم = كل مقابل حرمته كالبومه
ولدك قرشك ينفعك في شيبتك= فحافظ عليه وخل يكثر نومه
ترى ان صحى كالطير يبغى يكفخ=فلا تستمع له لو يكثر لومه
تلقاه لامن طحت وقت الحاجه = تشري به اللي تشتهي وترومه
كم واحد بالقرش اصبح عيلم= من بعد ماهو ينجهل في قومه
لو كان هايف اصل يعطيه الاصل= ويصير شيخ عالي برسومه