[عبدالمحسن الرحمه]

هلّ دمعي يوم صليت الفجر=بسباب فرقا شهرنا شهر الصيام
كن قلبي كاويه جمر السمر=والحشى كنّه مصوب بالسهام
جود خيرك نابع ٍمثل النهر=يستقي به صايم ٍدوم الدوام
لك قلوب صابرة تبغا الأجر=شاقها شوق المحبة والهيام
العمل يزداد في وقت العشر=يرقبون الليل من شان القيام
معتكف بالعشر ما يطلع شبر=يلهج بذكر الولي منشي الغمام
فيك ليله اسمها ليلة قدر=خيرها عن ألف شهر ٍ بالتمام
ليله ٍفيها علوم ٍكالدرر=من غنمها يبشر بجنة سلام
جوها هادي معطر بالزهر=نورها ينبان في وسط الظلام
يعجز التعبير ودوأت الحبر=عن وصوف شعور حبه والغرام
من غنم أيامه بذل وذكر=يسعد بيوم الحشر يوم الزحام
التباغض والتناحر والكدر=مالهن بصدورنا أية مقام
شهرنا شهر التأخي والصبر=شهر يجمعنا بألفه واحترام
هذا كفه مثل مزن ٍمنهمر=يعطي من حده زمانه للعدام
واعذابي من فراقك يا شهر=شهر خير ٍفيه ترويض الأنام
قاربك أقبل على شط البحر=معلن ٍتوديعنا شهر الصيام
يا شهر تكفى تصبر ونتظر=ارحم قلوب ٍتبي قربك دوام
عيني ياللي دمعها مثل المطر=دمعها خلا عيوني ما تنام
دايم ٍ ذكرك على قلبي يمر=حاز ذكرك بالملا أعلا وسام
المساجد لو لها حس البشر=كان ترفع صوتها والله حرام
كم عين ٍكم روح ٍفي خطر=لانطفت نور المساجد بالتمام
واعذابي كلما شفت القمر=نورة الخافت يودع باعتزام