[خالد بدر]

السلام عليكم ورحمة الله وبركاته


أيها الأخوة ..


أبعث إليكم نبض إحساسي وبعض مشاعري ..

عندما فقدت مسبحة ( سبحة ) غالية الثمن بالإضافة أنها احتلت مكانا في خافقي

وباعتبارها قديمة نادرة الوجود00


وقد عانيت أثناء فقدها من الهم والحزن ما يقارب أسبوعين،،

فقدتها وبكل آسى سطرت مشاعري بهذه القصيدة00




وهي السبحة نوع من الكهرمان الذي يلذع بالنار

وتكٌون النار اثرا احمرا على الخرزة،،

واللي فاهم بالسباح يعرف الأمر هذا

انضّمت اهمومي ثلاث وثلاثين=عد خرزة ضاعت من اغلى سباحي
يالعين ابكي كل كويه بدمعين=واشفي غليل ما لقى الانشراحي
باسباب فرقاها وياحظي الشين=مقدر ما جاك ما خطى مناحي
لحظه خطفها ساحر القلب والعين=كني بعلم فقت منه وراحي
ضاقت بي الدنيا وتطعن بسكين=مره تجي وتروح تدمي جراحي
اصبحت كني شايب بالثمانين=لا جا يوقف هز ايده وطاحي
والا كما مسكين تعبن من الدين= لا دق به هاجوس دلى يحاحي
من القهر قمت اصفق يسار بيمين=واردد الونه مساء وصباحي
تتل قلبي تلت الطير شاهين= حول على الصيده ورف الجناحي
يكفي حزن يا بنت قمتي تجرين= من الاسى والضيم والقدر فاحي
مملوحة وامرقطه كلها زين=والشعر تلعبه هبوب الرياحي
اخيوطها عرقين من هالشرايين= إن فارقني ذقت سم ذحاحي
اصفق بها في كل صفقه ببيتين=وارد بها لو وردت جم قراحي
يسوى لها بقلبي ثلاثة ملايين=مع صفة قصورن بحي الفلاحي
هذي وصوفه باقين فوق ستين=الزين كاسيها جداد الوشاحي
إن ردها جعله بدرب التقيين= وإن صد جعله ماهتنى بالمراحي
تتلي عليه اهموم واتصف صفين=كل تسابق له وماهن شحاحي
تعطي عطايا ما تبرك بعارين=واليأس يغلق عنْه باب النجاحي
ويصير في دنياه ما بين نارين=تلفيه بقعا من جميع النواحي
صلو على محمد ختام النبيين= اعداد برق فالسموات لاحي

أتمنى أن ترتقي لذائقتكم الفريدة00

ونبشركم أنه ردها بعد ما علم بهذه القصيدة///

ودمتم سالمين ,,