كنت احسب إنّ الحب وهم المحبين= واثره حقيقه ثابته بالدليله
من يوم فز القلب والعين بالعين = لما لمحت البدر اشرق بليله
ريم حسين الدل يمشي على هوين= صوب سهامه مادرى إني قتيله
لاني غريرٍ يجهل الشين والزين = ولانيب غصنٍ كل شئ يميله
صحيح احب الفل والزهر والتين = واحب اناظر للورود الجميله
لكن ثقيل وشايلٍ حمل ثقلين = عقل ورزانه في دروب الفضيله
حتى لمحته في الوسط بين ثنتين= شيخ الدلع والغنج مابه مثيله
من نظرته ضيعت مدري انا وين= ومن بسمته اشعل بقلبي فتيله
قربت حوله دون مااشعر بمترين= وهو يطالع بي يبيني اجي له
وهمس سمعته بينها وبين الادنين= يقرب وفيه الآه زفره هزيله
وكرتٍ تسلل فيه رقم وعناوين = خذته ولو نفسي تعيي تشيله
دقيت رقمه بعد ما مر يومين = ثمن قطعته خايف من الفشيله
وجاوب بعد برهه نشدني انا مين= قلت القتيل اللي عرضتي سبيله
ضحكت وقالت بمنتهى اللطف واللين = انا الضحيه عندي اكبر دليله
من يوم شفتك شفت من لاق للعين= اللي تمنيته ولا بي بديله
احلم وافكر به يجي لو بعد حين = والحظ جابك لي بلحظه جميله
لا تحسبني جاهله فيك يالشين = لو ابتعدنا من سنين طويله
اتابع اخبارك ولو كنت في الصين = واكتم شعوري ما ابين قليله
ان كان تذكرني وانا وانت طفلين = مع بعضنا نلعب بذيك الخميله
كنت تغار ولو رماني من الطين = اية احد تضربه وتهد حيله
وانا استمع كني بحلمٍ من سنين= وشلون جمّعنا القدر بعد ميله