لا تعتذر ماعاد للعذر داعي = منك انتهى قلبي ولا لك بقيّه
ما كنت اظنك ماشيٍ في خداعي = حتى انكشف سترك وخبث الطويّه
ويلك من اللي للخلايق يراعي= وشلون قلبك طاوعك بالأذيّه
كنت احسبك سيفي بوقت الدفاعي= ودرعي الى من جار وقتي عليّه
واثرك بظهري خنجرٍ طول باعي = مزق حشاش القلب وارهاه كيّه
تبيعني في سوق سقط المتاعي = بيعة سروق والبضاعه رديّه
وانت الوحيد اللي تعرف بطباعي = وتدري بقلبي طيّبٍ بالسجيّه
ما اخفيت شيٍّ عنك حتى استماعي= يومن كذبت وقلت عني الوشيّه
والمشكل انك جيت تلوي ذراعي= وتنبش سنينٍ ماضياتٍ عتيّه
اللي سببها منك لو كنت واعي= وتذكر بدايتها بعقل ورويّه
يومك تبيني مثل بعض الضفاعي = اللي ولا زالوا بحالٍ رثيّه
نسيت يوم انك تجي باندفاعي = تقول احبك بين كل البريّه
يا فارس احلامي ومصدر شعاعي= نور الأمل في دنيتي والهويّه
صدقت هرجك وابتديت بضياعي= آلفّ في كونك بلا جاذبيه
حتى انكشفت وبان حبك صناعي= المصلحه ساقتك يمّ الضحيّه
مافيه داعي نفض باق الشراعي = ماني من اللي خنجره في خويّه
رح في امان الله هذا وداعي = ما ظن لي بك دامت الروح حيّه