طرف العيون الناعسه سهم صايب= ياما شكى منّه جميـع الحبـايب
احـدٍ خلص منّه واحد منه مسحور=
ونا الـذي لا زلت اشكي اللهـايب=من سهم صوبني وصاحبه غايب
قفّى وخـلاني على البعد مقهور=
ادري بحبّـه صـادقٍ غير خـايب=ويـدري بحبّـي دايـمٍ فيه ذايب
نبني الامـاني في خيالاتنا قصور=
باسبـاب خط وخط عشنا المصايب=واحـلامنا ضـاعت بتفكير شايب
يقول يابني خذ اصيله من الحور=
حـاولت جهـدي اقنعـه بالدليـله= نرجع لقول الله ونرفض بديله
فالفرق في تقواه بالأمر محصور=
ما هـوب لاصـل وفصل والا قبيله= الكـل لآدم والخــلايق رعيـله
هـذا كـلام الله في رقّ مسطور=
والحبّ يـابـا من دروب الفضيـله=ما حـرمّه ربّـي بآيـه جليـله
وانسان ما له حبّ كالطير مكسور=
ودّه يحصـل حـبّ بايـة وسيـله=حب اصيـل من قلـوب أصيـله
ماهوب حب الغش والكذب والزور=
اقسم عليّ وقـال هـذا قـراري= ما ارضاك تاخذ من بنات السراري
وان كان جاهل فافهم العلم والشور=
الله ومـرك بطـاعتي واصطباري= وانته تطيـع ابليس تبغى احتقاري
اسمع كلامي قبل مادمي يفور=
الحب يا ابني من طبـاع الخكاري= اللي طـوال الوقت كاس وجواري
مسطول داير والعقل دوم مبتور=
والحب عشره من زواج اعتبـاري= ما هـوب متعة وقت والا تجاري
ان كان ما تسمع فلا شك مسحور=
ضاقت بي الدنيا بعد هي وسيعه= كلمتها بالعـلم ، قـالت خـديعه
اعرف هدفك ولاانت بالعذر معذور=
لكن ترى الأيـام تركض سريعه=لك يـوم يالظـالم وارد الـوديعه
تدفع ثمن غلطتك يالبيه مغرور=
من عقبهـا مـا بيّنت بالبديعـه= والبيت فـاضي ما بقى الا رجيعه
ولا حدٍ عرف لاوين راحت على الفور=
ومن بعدها ما شفت غير القطيعه=وقلبـي يتقطع ذاهـل من الفجيعه
مقـدرعلى النسيان بالقلب تنور=
مشيت انا انشد شارد البـال هايب= تاهت خطاي وما تركت السبايب
وفي الاخره ضاعت تقل بيض عصفور=
واصفط بجنب جــدار بلحيل عايب= القط نفس من جهد شد الركايب
والا عجـوزٍ اشرت بآخر السور=
قـالت توصّـلني ينـوبك ثـوايب=مالي احد مقطوعة من القرايب
ولا ني من اللي يرتضن اي طرطور=
ركّبتهـا أرجـي جزيـل الوهايب=الشارع أظلم والحـواري غرايب
أسوق وتشّر كنّي العبـد مامور=
وفي حـارة واضح سككها رزيـله= مهجـورٍ اغلبهـا لمده طويله
قالت وصلنا وقلطتك مابها شور=
تقسم عليّ ايمــان غلظه ثقيـله= وادخـل بويتٍ بالفقر طال ليله
خرمس بليا سراج ما وصله النور=
جابت أبـو دنـان تشعـل فتيـله= والقهوه بترمس ومسمار هيله
وقمت اتفنجل والسواليف بالدور=
وخـذت اتفكّر في الفقر والرذيله= فالبعض رغم الفقر نفسه جزيله
ما ينحني راسه ولا يقبل الجور=
فجأه يطق الباب من غير طـاري= وتطمرعجوزي مثل حصني البراري
وتدخل غزال كنها ذيب مسعور=
متستره والصـوت فيه انكساري=قالت سـلام بهمس خلف الستاري
وكني عرفت الوجه مع شقحت النور=
ولمح عجوزي طالعه في وقاري= صكت علينا الباب دون اعتذاري
وجتني الغزال وشكلها حيل ممرور=
قمت ابرحب ، قالت اليـوم ثاري= مصيود يالطير المهـاجر بداري
يا ما حرقت القلب ما عندك شعور=
ما اقسى فؤادك ول ، ياما القطيعه= فعلتك في قلبي تراها شنيعه
سن بسن وقلب عن قلب مقهور=
ما هوب حكمي بس حكم الشريعه= حكم القصاص وواجب انا نطيعه
من ينقذك منّي وفي اليد ساطور=
قلت العفو با ام العيـون الوسيعه= يا قلبي اللي ما تهنـا بربيعـه
عندي طلب من قبل مالراس ميتور=
من صـاحب الخطه تراها فظيعه؟= قالت بسيطه في زمان الخنيعه
القرش يشري ما تبي دون محذور=
ممكن طلب آخـر ولا به ضرايب= ضم القلب مع قلب ناوي الحرايب
ثم اقتليني واحرقيني بدافور=
بعـد الطلب والكل دمعـه سكايب= نبـدا نتحدث بالعقل في العقايب
لكن بلا احلام فالحلم محظور=
كل يتجوز في زمــان العجايب = ما هو على كيفه وهذي مصـايب
امّا عنوسه او طلاق من الجور=
والا انحـرافٍ واضح لكل صايب= يجري بنا التيـّار والعقـل غايب
واللي بعقله.. قلبه اليوم مفطور=