[الطائر المهاجر]

وش يبـون الغرب منّا وش يبون = ما كفى إذلالنـا بين الأمّـم
من وعيت الفكر والعـرْب مغبون = يكتب التـاريخ مايملي القلم
اسرقوا ثرواتنـا شلنا الديـون = وما سلمنا كل يوم وألف ذم
وان بغينا الحـقّ زادوا بالمجون = حاصرونا وحشرونا كالبهم
كل منّا يشتكــي ما يسمعــون= بعضهم ظالم وبعضٍ كالأصم
يفعلـون بنا على ما يشتهـون = ركعونا بين مخدوم وخـدم
يازمـان الـذل في قلبي طعـون = ما أطيـق العيش قلبي انكتم
تنطق حروفي ولا فيها شجـون = أكتب القيفان من نــارٍ ودم
لا متى هالوضع يا أهـل الظنون = لا متى نحيّـا وكلٍ كالصنـم
لا تقولو الدين من دونٍ لـدون = ولا تقولوا حاكـمٍ خان القسم
السبب منّـي ومنّـك لا تهـون = ما نفكـّر بالعواقب كالـرخّم
ما نفكـر غير في ملي البطـون = والمكاسب لو نرابي في نهم
عايشينٍ في رفـاه وفي سكـون = راغبين الذل نحيـا كالبجم
والذيّـابة حولنـا ما يرحمـون = يلغفون الشاة ما تدري الغنم
وكّلـونا الطعم قالـوا يدلهـون = حركـوا فينا الغـرايز باللحم
وقسمـونا بين ديّن أو بـدون = وبين علمـاني بدينه انظلـم
لو بغينا العقـل في دينٍ يكـون = جاهلين الـدين يبدو بالتهـم
اشغلونا بالفـروع وبالغصـون = غضوا الأطراف عن بيع الذمم
وانت يامن بالفكر وسط الحصون = مرجـع الحاكم برأيك والحكم
كان تنـوي رحمة الربّ الحنون= خـاف ربك دايمٍ شورك نعم!
ما تقول الحق حطك له عيــون= يفعل اللي يقـدره مما لـزم
شاري الدنيا ولو عشت القـرون = صحح الأفعال من قبل النـدم
يـوم لا ينفعك لا مـال وبنـون= عند من اوجدك من شيّن عدم