[الطائر المهاجر]

كل موقع مثل دكانٍ وحنّا به زباين= ان كسبنا صاحبه بالطيب نشري ما نريده
وان عبس بوجيهنا نمشي ولاحتى نعاين= غيره ابرك منه لو في البيع اسعاره زهيده
وبعضهم طيّب ولكن واثق بخبث البطاين= انخدع فيهم ولو هم من قريبين البديده
ناصبينٍ للشراك وحافرينٍ للكماين = وماهرينٍ بالتفوق في اساليب المكيده
نفّروا هذا وهذا وقرّبوا خبث النماين= من خميمٍ ما يفكر غير بافكار بليده
متعبين اللي شريفٍ شايفٍ كل الغباين= ينفد بجلده ويمشي قبلما ذيخٍ يصيده
ثم يبدا السوس ينخر من تحت ماهوب باين= لين ما ينهار صرحٍ فوق راس اللي يشيده
انتهى الدكان خاسر وافلست كل الخزاين= والملامه والشماته من نصيبك ياعميده
فالرجل يبغى رجالٍ بالدلالة والقراين = مجلسه محسوب ضده او معه يعلي رصيده
وبعضنا تلقى بقربه ورد من كل الجناين= يحترم نفسه وغيره في مواجيبه وليده
والبعض منا حصاني عاثياتٍ بالمداين= بالمكر من تحت تسعى وتظهر اخلاق حميده
تخدع اللي ما عرفها لين تمسك بالملاين= فالشعر شهره وتمره تنلحس قبل القصيده
رحمةٍ كثر المواقع فابتعد عن كل شاين= واختر اللي في رجاله من يشوف إنّك عضيده
معرفة رجّال مكسب في زمن كثر التباين= اختلط دره بنفوه حتى في صدق العقيده