[الطائر المهاجر]

الظلم في بعض الأحايين مطلوب= لاصار في صالح شعوبٍ جهيله
فالشعب لامن صار جاهل ومضروب= بالتفرقه والحقد شعب وقبيله
حتى يؤسس منه دوله لها رتوب= مهيوبة ماهيب اية دويله
ولو حاولت بالعدل دستور مكتوب= رضا الخلايق غايةٍ مستحيله
فهذا يشوف انه بعد عز مغلوب= وهذا تمكّن بعد عيشه ذليله
وهذا يشوف انه من الحق مسلوب= وهذا بشطاره صار دوحه ظليله
لكنهم صاروا كيانٍ له حسوب= من بعد ما كانوا بحالٍ عليله
كلٍ يحس الأمن بالبيت ودروب= لو هو مشى بالليل ماخاف غيله
ومن ناظر العالم دويلات وشعوب= ف الغرب والاّ الشرق فكره دليله
يدرك بأن اللي تسيّد ومهيوب= يومٍ توحد بعد حربٍ طويله
ما ينبني مجدٍ على اشتات وحزوب= ولا يردع العادي فئاتٍ قليله
وحنا توحدنا بعد جهد وتعوب = وصارت لنا الهيبه ولا هي دخيله
احفاد من ساد الورى شرق وغروب= امه لها التاريخ اوفى بكيله
انهار تحت اقدامها كل مجذوب= ممن حقرها وانتهى بالفشيله
كسرى وروما وكل من كان معطوب= فكره ولا قدر رجال الشكيله
اللي بعد توحيدهم جوه بقلوب= وحده تبي ترفع شعار الفضيله
من دون وحدتنا ترى الخزي مجلوب= فلا ننخدع باللي يدور وسيله
يحاول يفرق بيننا تقل مطبوب = مذهب وعرقٍ شان يشعل فتيله