[الطائر المهاجر]

كنت اتغنى بك وبالحيل اغليك = واكتب بك اللي ما انكتب بالقوافي
واليوم مالي واهس لو اداريك = حتى الشعر عيا لمثلك يصافي
تخطي واسامح بالغلط ما اجاريك = واقدر ظروفك وما كان خافي
لكن اشوف ان الغلط ما يخليك = ومن كان ذا طبعه فحبه يعافي
اتعبتني من كثر ما ارفا تجنيك = حتى زهقت فْما جرى منك كافي
امن أولٍ افزع اذا جيب طاريك = ويا ويل من طالك بهرجٍ جزافي
ومن أولٍ شايلك في الروح افديك = مسكنك وسط القلب فالنبض غافي
واليوم من قلبي فلاعدت ادانيك = هذي الحقيقه صادق في اعترافي
رح في طريقك سهل الله خطاويك = منتب كفو اللي على الدوم وافي